Deuteronomy 5
A Vinara na Vure i Ravulu
(Nimariu 20:1-17)
1E Moses i gale palupu e huriki a bakovi a ngatavine ne Israel, ri valai palupu ri vapopo, i taki ria, “Mua o huriki a Israel, mu longo kamumu a maka vinara ga taki mua vona ngane, mu tovo mu ramai kamumu. 2E BAKOVI DAGI a Vure ne hita, i rata a ngava dagi turane hita na lolo e Sinai. 3I uka ma i rata kunana a ngava dagi ne huriki e tamane hita kunana, hita mona ranga i rata a ngava dagi turane hita. 4E BAKOVI DAGI i made pololilo na kanono, i ngalai hita, i ta turane hita na lolo. 5Na tahuna iea e BAKOVI DAGI i taki iau ga habia ne mua a ngavana, a vuhuna mu mangenge na kanono, i uka ma mu sike na lolo. Lakea e BAKOVI DAGI i ta maea, 6‘Iau e BAKOVI DAGI a Vure ne mua. Na tahuna mua a vorakato o Egipto, a bole tala mua vonga, a taparaki valai mua koea.7“‘Naha ni kavurike a vure ranga. Mu kavurike iau kunana.
8 a “‘Naha ni rata a hanuna maki ri tabuli na hunu, ri tabuli na malala, ri tabuli pololilo na dari. 9 bNaha ni turume puru mu gu kavurike ria. Iau kunana e BAKOVI DAGI, a Vure ne mua, a bage ne mua naha ni kavurike a vure ranga. Bara vakamadihi a hamone huriki i uka ma ri ngaru iau, ge harena ne tubune ria, ne tamarane ria. 10Pali e huriki a bakovi a ngatavine ri ngaru hateka iau, ri ramai a vinara nau, bara ngaru hateka e huriki a hamone ria, ri ala rangale (1,000) ri gi bele muri ma.
11 c “‘Naha ni kaba tavula vona a rane BAKOVI DAGI a Vure ne hita, a vuhuna e huriki ri kaba tavula na ragu bara ri tahoka a ngava.
12 d “‘Iau e BAKOVI DAGI a Vure ne mua, a vakuku mua, mu tabea a Parava Nimalo ga parava nau kunana. 13 eMu rata a maka leho ge harena na parava i polotara. 14A parava polorua a Parava Nimalo, a parava nau. Na parava iea, mua turane huriki e tune mua, e huriki a vora ne mua, a maka sipsip a bulmakau ne mua, e huriki a mosi ri made turane mua, mua lobo naha ni leho. Lakea e huriki a vora bakovi a vora ngatavine ne mua, ria ranga ri gi malo manga mua. 15Mu luhoi mule a tahuna mua a vorakato iea o Egipto, na nitora dagi nau, iau e BAKOVI DAGI a Vure ne mua a bole valai mua koea. Na naro a rata virihi mua vona kunana, a vakuku mua mu gu ramai kamumua a vinara na Parava Nimalo.
16 f “‘Mu togo e tamane mua e kinane mua, i manga iau e BAKOVI DAGI a Vure ne mua a vakuku mua. Bara mu rata mavonga, a maki lobo mu rata bara ri bele kamumu, bara mu made tabaka na malala ra habia ne mua ngane.
17 g “‘Naha ni rabalaki a viri.
18 h “‘Naha ni mole.
19 i “‘Naha ni panaho.
20 j “‘Naha ni kau virihi tavula na ngava a viri.
21 k “‘Naha ni ngutu na girihina bakovi tara. Naha ni ngutu na ruma vona, na malala vona, ne huriki a vora vona, na maka sipsip a bulmakau vona, na maka mahala vona.
22 l “‘Na tahuna mu vapopo na dahana lolo, e BAKOVI DAGI i made pololilo na kanono na bubu na hini i uvo hateka. I ta dagi hateka, i habi ne mua a maka vinara lobo nga. I uka ma i habi tabu ne mua ranga. Muri i here a maka vinara nga na tabekena kedo i rua, i habi nau.’
E Huriki a Israel Ri Mangenge
(Nimariu 20:18-21)
23“Na tahuna a kanono i kavitagua a lolo iea, mu longoa a lohona viri i ta pololilo na hini i uvo, lakea e huriki a matakari na kabu, a gare ne mua, ri valai nau ri ta maea, 24‘E BAKOVI DAGI a Vure ne hita i vakasiri a bagetua a nitora dagi vona na tahuna si longoa i ta tala na kanono. Ngane si lohoka vona na tahuna a Vure i ta turana a bakovi, a bakovi i uka ma ge mate. 25Pali mia bara mi longoa a Vure i ta turane mia tabu, bara mi mate. Ra kanono iea i hube hateka, mi pesi tabukoi vona, pali i navai i uka ma mi mate? 26E rei a viri i uka ma ge mate, na tahuna i longoa a Vure mahuri i ta tala na kanono, i manga a hini mi longoa balaka taku pali? 27O Moses, o hamule, o longo a ngava lobo ne BAKOVI DAGI a Vure ne hita ge taki. Muri o valai o vakalongo mia, mi gi longo, mi gi ramai.’28“E BAKOVI DAGI i longo a maka ngava mu taki iau vona, lakea i taki iau i ta maea, ‘Iau a longo pali a nitane huriki a bakovi a ngatavine, a nitane ria i malamala. 29A ngaru ria ri gi luhoi maea vakaroro, ri gi togo iau, ri gi longototo a maka vinara nau vakaroro. Muri a leho lobo ne ria, ne huriki a hamone ria bara ri kamumu vakaroro. 30Ngane o vano o taki ria ri gi hamule mai a kape ne ria. 31Pali ioe o Moses o made turagu, ga habi vomu a vinara lobo nau. O tovo e huriki a bakovi a ngatavine na maka vinara nau, ri gi ramai kamumu na malala a habia ne ria ri gi made vona.’”
32Lakea e Moses i vara e huriki a Israel i ta maea, “Mu matadoko, mu ramai lobo a maka vinara ne BAKOVI DAGI a Vure ne hita i habi ne mua. Naha ni longotaroa tara vinara. Naha ni makope lakea na maurine mua o na kanene mua. 33Mu ramai lobo a maka vinara e BAKOVI DAGI a Vure i vakuku mua vona, a maki mu rata bara ri bele kamumu, mu made tabaka na malala mu gu bolea ngane.”
Copyright information for
BNP